Новата сезона во шпанското фудбалско првенство почна во знакот на македонскиот репрезентативен голман, Столе Димитриевски. Тој беше избран за играч на натпреварот во ремито на неговиот Рајо на „Камп Ноу“ против засилената Барселона.
Иако дебитираа Левандовски, Рафиња, Кристенсен и Кеси, Барса не го најде патот до мрежата на Столе, а неговите 6-7 интервенции го одбележаа натпреварот.
„Задоволството е големо кога тим како Барселона нема да постигне гол против вас на три натпревари, два едноподруго на „Камп Ноу’. Но, ова не е некое изненадување. Ние веќе ги победивме минатата година и посакувавме да го повториме тој резултат.
Бевме одлични во одбраната, но имавме и некои свои шанси за да дојдеме и до три бода“, рече македонскиот репрезентативен голман.
Во зимскиот преоден рок Димитриевски беше многу блиску до трансфер во Барса, но одбивањето Нето да замине од клубот не му дозволи да го оствари трансферот на кариерата. Сепак, и во дресот на Рајо Ваљекано го покажува неспорниот квалитет.
