Министерството за внатрешни работи (МВР) обезбеди фотографија од лицето кое со огнено оружје пукаше кон две лица во трговскиот центар Ист Гејт Мол во Скопје при што тие се здобија со повреди и беа пренесени во болница за укажување помош.
„Во врска со пукањето кон две лица од огнено оружје кое беше пријавено денеска (24.10.2023) во трговскиот центар Ист Гејт во Скопје, кои се здобиле со повреди и се пренесени во болница за укажување помош, МВР ја информира јавноста дека на фотографијата обезбедена од полициските служби е лицето што го изврши кривично-правниот настан. Притоа, ги повикуваме сите граѓани доколку го забележат ова лице, имаат било какви сознанија за него или корисна информација која може да помогне во истрагата која СВР Скопје ја води во координација со Јавен обвинител, веднаш да известат во најблиската полициска станица или анонимно да пријават на телефонските броеви 192 или 112“, велат од МВР.
